A+ A-

கட்டார் எல்லையை மூடியது சவூதி அரேபியா

கட்டார் நாட்டுடனான தரைமார்க்க எல்லைப்பகுதியை சவூதி அரேபியா நிரந்தரமாக மூடியுள்ளது. இதுகுறித்து சவுதியின் சுங்க வரித்துறை நிர்வாகம் தரப்பில் வெளியிட்ட கடிதத்தில் கூறும்போது, சால்வா எல்லைப்பகுதி திங்கட்கிழமையிலிருந்து நிரந்தரமாக மூடப்பட்டுள்ளது என்று கூறப்பட்டுள்ளது. இதனை சவூதி அரேபிய அதிகாரிகள் உறுதிப்படுத்தியுள்ளனர்.

தீவிரவாதத்துக்கு கட்டார் ஆதரவளிப்பதாக குற்றம்சாட்டி அந்த நாட்டுடனான தூதரக உறவை சவூதி அரேபியா, ஐக்கிய அரபு அமீரகம், பஹ்ரைன், எகிப்து ஆகிய நாடுகள் அண்மையில் துண்டித்தன. இதன் காரணமாக கட்டார் மீது பொருளாதார தடைகள் விதிக்கப்பட்டன.

இதனைத் தொடர்ந்து சவூதி, ஜூன் மாதம் இரண்டு வாரங்கள் கட்டார் நாட்டுடனான தரைமார்க்க எல்லைப்பகுதியை மூடியது. இந்நிலையில் தற்போது கட்டாருடனான தரைமார்க்க எல்லைப் பகுதியை சவூதி நிரந்தரமாக மூடியுள்ளது குறிப்பிடத்தக்கது.