அமெரிக்க மக்கள் மனதில் இடம்பிடித்துள்ள முக்கிய பிரமுகர்கள் குறித்து சி.என்.என். செய்தி நிறுவனம் தொலைபேசி மூலம் கருத்து வாக்கெடுப்பு நடத்தியது. இதில் முன்னாள் ஜனாதிபதி ஒபாமா முதலிடம் பிடித்துள்ளார். அவருக்கு 17% வாக்குகள் கிடைத்துள்ளன.
அடுத்தபடியாக தற்போதைய அதிபர் டொனால்ட் டிரம்புக்கு 2ஆவது இடம் கிடைத்துள்ளது. இவருக்கு ஆதரவாக 14% பேர் வாக்களித்துள்ளனர். அதேநேரம் போப் ஆண்டவர் பிரான்சிஸ் 3ஆவது இடம் பிடித்துள்ளார்.
இதன்மூலம் ஒபாமா தொடர்ந்து 10 ஆண்டுகளாக அமெரிக்கர்களின் மனதில் முதல் இடம் பிடித்துள்ளார். இதுவரை நடத்தப்பட்ட கருத்து வாக்கெடுப்புகளில் அமெரிக்க மக்கள் மனதில், பதவியிலுள்ள ஜனாதிபதியே முதலிடம் பிடித்துவந்தார். டொனால்ட் டிரம்ப் பதவியேற்று ஒரு ஆண்டு நிறைவடைந்துவிட்டது. இருந்தும் அவரால் மக்கள் மனதில் முதலிடம் பிடிக்க முடியவில்லை.
அமெரிக்கர்கள் மனதில் இடம் பிடித்துள்ள பெண் பிரமுகர்களின் பட்டியலில் ஹிலாரி கிளிண்டன் முதலிடம் பெற்றுள்ளார். அவருக்கு 9% வாக்குகள் கிடைத்துள்ளன. மிச்செல் ஒபாமா 2ஆவது இடம் பிடித்துள்ளார். அவருக்கு 7% வாக்குகள் கிடைத்துள்ளது. இதன்மூலம் தொடர்ந்து 16 ஆண்டுகளாக ஹிலாரி கிளிண்டன் முதலிடம் பெற்றுள்ளார். அதேநேரம் தற்போதைய அதிபர் டொனால்ட் டிரம்பின் மனைவியும், அமெரிக்காவின் முதல் பெண்மணியான மெலானியா டிரம்புக்கு 1% வாக்குகளே கிடைத்துள்ளது.
அமெரிக்காவில் இரண்டாம் உலகப் போருக்கு பிறகு அதாவது கடந்த 1946ஆம் ஆண்டில் இருந்து இதுவரை 71 தடவை இத்தகைய வாக்கெடுப்பு நடத்தப்பட்டுள்ளது. அவர்களில் இதுவரை பதவியில் இருந்த 58 ஜனாதிபதிகள் முதலிடம் பிடித்துள்ளனர்.